لما تحب حد

لما تحب حد ماتحسسوش انك مضحي قوي عشانه..مش عجبك تضحي او شايفها كبيرة محدش ضربك علي ايدك يعني.

لما تحب حد ماتبطلش تهتم بيه.حتي لو انت متاكد انه متاكد انك بتحبه..في ناس بيوحشها الاهتمام ده. 

 لما تحب حد ماتزعقلوش وتقوله ان كان عاجبك..وانت عارف كويس انه بيحبك ومش هيسيبك..مش جزاته يعني.

لما تحب حد ماتتريقش عليه كتير.

لما تحب حد قوله كتير.ولما يقولك انه بيحبك ماتبقاش تتريق عليه برده.

لما تحب حد ابقي اسأله بتنام كويس..ولو قالك آه ابقي قوله بجد؟؟ ولا انت مخبي؟

لما تحب حد ابقي اخترع اي حوار اهبل عشان تتكلموا..شوية شوية هتلاقوا كلام.

لما تحب حد ماتبقاش طول الوقت مركز مع عيوبه..ماهو بيحبك علي عيوبك برده.

لما تحب حد ماتقفلوش عالوحدة خاصة لو كان هو بيعدي لك برده.

لما تحب احترم رغباته في نقط معينة..حتي لو مش مقتنع بوجهه نظره.

لما تحب حد ماتحسسوش انه مهما عمل مش هيثير اهتمامك..ياسيدي اعمل مهتم..هيتبسط ويشيلهالك.

لما تحب حد وبعتلك مسج ومش فاضي ترد عليه لما تكلمه بعدها ابقي قله حلوة المسج اللي بعتها.

لما تحب حد جرب تكون صريح معاه قوي وشوف رد فعله ايه.

لما تحب حد ابقي خدلك جنب وانت متضايق منه..عشان الدنيا ماتولعش علي سبب هايف.

لما تحب حد جدد حبك ليه حتي لو بكلمة انت فاكر انه مش محتاج يسمعها منك