عمري ماهفهمه

البنت تعبانة قوي..عمالة ترجع..بتجيب كل اللي في بطنها..انا مش فاهمة مالها...

الساعة اربعة الفجر..مفيش دكاترة فاتحين..هروح المستشفي..يقوم جوزها يلف يدور علي عربية..الراجل يسحله وياخد منه عشرين جنيه ..امال مش توصيلة مخصوص وفي عز الليل والبرد..

يوصل الاستقبال..مايلاقيش دكتور..نايم فوق..

يستني يصحوه..ينزل ليهم متعصب..ويزعق ويقول الكشف مش هنا يامدام الكشف النهاردة في الأحرار..

الست تبص لجوزها كده مستغربة...وتقول للدكتور طب بص عالبت والنبي دي تعبانة قوي..

يرد

ياماما احنا مانستقبلش الا حالات العناية....روحي بالبت الأحرار..مفيش استقبال هنا النهاردة..

طب حضرتك مش دكتور..بص عليها بس..

يرد تاني ويقولها البت كويسة..روحي بيها الأحرار..

هتحصل حاجتين

ياجوزها يتخانق ويشتم ويزعق..

يايمشوا وهما في حالة صدمة ورعب علي بنتهم اللي لسه هيلفوا بيها السبع لفات ويروحوا الأحرار..ده لو كانت العربية اللي جايباهم مامشيتش اصلا!!!

مش قادرة اهضم فكرة اني امطوح ناس من صيدناوي للأحرار لمجرد ان حالتهم تستحمل

تعالوا نتخيل كده..

الساعة ..اي زفت وقت في اليوم...

بنتي..او بنتك..

سخنة..بترجع..بتكح..بتعيط"ودي اكتر شكوي بنكشف عليها من غير نفس"

تخيل احساسك ببنتك..هتجري بيها..

جاي ماشي..معاك عربية..جاي علي رجلك..جاي علي موتوسيكل...

رايح المستشفي بتدور علي حد يسعفك او يريحك او يفهمك الواد ماله

تدخل تلاقي ممرضة تقولك مافيش دكاترة..

او تلاقي دكتور يقولك مافيش كشف ..الكشف النهاردة في الأحرار..

مش حقول انطباعك ايه..لكن هسيبك تتخيل احساسك

رجعت تاني..بتدور علي مواصلة تروح بيها..ركبت الموتوسيكل والمدام وراك..سواء بقي الجو برد حر تراب هوا مش مهم..اديك شربت مشوار تاني يامحترم..

مش جريمة انك تقلق علي ابنك

مش غلط انك تستغرب رفض تقديم الخدمة

انا من اكتر  الناس اللي كنت بشجع الكولد والهوت وتحويل الحالات..

لكن لما يلمسك رعب اب علي ابنه

او لما تشوف ام مدمعة علي الرغم من ابنها كويس جدا

هتعرف قد ايه ان دورك انك تطمنها وبس مهما كانت الشكوي هبلة او مستفزة..

هي مش دكتورة عشان تقدر خطورة الحالة من عدمها..

لما في لحظة تحط نفسك مكانها او تشوف ايديها وهي ببترعش وهي بتحط الولد بين ايديك مسلماه ليك امانة

بتبلع كلامك بلع عشان تلاقي كلمة تطمنها....

ولما تتحول ايامك في الاستقبال من ضغط عصبي وخناق وقلة نووم وقرف

لضحك وتواصل مع الناس وكل ام تمشي من عندك تدعيلك هتحس انك اجمل شخص في الدنيا..

لما البيبي يكون بيعيط علي ايد امه وانت تشيله منها وتفاجا انك سكت علي كتفك هتحب شغلك قوي..

لما تشوف عشرة داخلين مع العيل وبدل ماتزعق فيهم وتطردهم تطمنهم بكلمة واحدة وتطلب منهم انهم يطلعوا برده بهدوء  بيطلعوا في ثانية

بس..بس..بين لهم انك حاسس بيهم..وبعدين اعمل اللي انت عاوزه

الناس بتحس..وبتعرف مين اللي بيكشف بنفس ومين اللي بيحب شغله.

هتزعق..وهتشتم  بس مش هتوجع حد...

اقسم بالله اني صوتي بيجيب اخر الاستقبال من غير ماحد بيرد عليا او يقل ادبه

معرفش ليه

انا بقي دلوقتي مش قادرة ابلع فكرة اني اروح حالة بتقولي اكشفي عالواد..

كنت الأول عادي..دلوقتي مش قادرة

اطلاقا..

المهم

المطلوب يعني

حد بس يفهمني انا مش عارفة ارجع الحالات الأحرار ليه؟؟

اه ملحوظة

انا بقيت بحب نبطشيات الاستقبال قوي

وبكرة نبطشيات القسم قوي قوي