دروس مستفادة

بما اني دايما بحط نفسي في مواقف لا أحسد عليها ودايما بعير عنها بأني اكلم حد من العيال اوالبراءة بتنط في عيني وابدأ كلامي بكلمة"عملت عملة سودة" منهم ولاء ترد عليا تقولي عملتي ايه يا منيلة!!!!!!!

هيهيهيهيهيهيهيهييهيهيه..وعلي ماسبق فانني اجروء ان اعطي بعض النصائح والعبر من هذه العمايل السودة واللي طبعا مش هجيب سيرة معظمها هنا لسبب اساسي اني مش فاكراها!!!

المهم

1-معظم المشاكل تحل من تلقاء نفسها..يعني مثلا لو حد عمل موقف ضايقك والله متعلقش اصلا اعتبر مفيش حاجة حصلت لا تاخد موقف ولا تتصل تتخانق واستني استني شوف ايه اللي هيحصل ..

2-مفيش مشكلة بتحصل بتكون نهاية العالم...معظم البلاوي اللي بتحصل لنا بتكون احسن حاجة حصلت بس احنا عشان اغبيا ومتخلفين ومعندناش يقين بالله بنترعب قوي من اي حاجة تهدد استقرارنا الداخلي او الخارجي!!!!مع ان عادي يعني اللي انت شايفة زفت قوي بيطلع في الآخر ولا حاجة.

3-التجاهل اهم سلاح في العالم!!!!!!!!!!!!!!!!!!!!مهما كنتي مؤمنة بأهمية مشاركة اللي انتي حسه بيه مع الناس او رافعة شعار انا صريحة ومعنديش حاجة اخبيها...صدقيني قليل من  الصمت له سحر غريب..

4-معظم المواقف برده قلة التعليق عليها كويس..

5-الشاي بالكراميل حلو قوي لازم تجربوه.

6-لبن نيدو لازم المية تكون سخنة مش مغليه عشان مايكتلش ويدوب كويس!!

7-لو معندكش مشاكل مع نفسك وقابلها كوبس قوي عمر ماحد في الدنيا ديه هيقدر يعكر مزاجك بكلمة واحدة..

8-في حاجات في الدنيا ماينفعش تعديها او تنساها اهمها بالنسبة لي ان حد يعتبر وجودي في حياته أمر مسلم بيه..انا لا انسي هذا ابداولا اسامحه ابدا ابدا ببساطة شدبدة لأني عارفة قيمة نفسي كويس واتوقع من اللي قدامي انه يعرفها برده..وببساطة اشد اللي مش عارف قيمة اللي في ايده يبقي يعاقب بحرمانه منها!!!!!

9-اوعي اوعي اوعي تكوني البنت اللطيفة...لطيفة يعني سهلة وممكن تقبل اي نوع من انواع المعاملة الزبالة..خليكي قوية ومفترية واللي مش عجبه الباب يفوت ...ولا بلاش خليني مؤدبة!!

10-اداكي ميعاد وقلبك وقعدت ترني ترني عليه "اي نوع من انواع المواعيد علي فكرة ان شالله شغل..سواء ولد او بنت بصفة عامة..استني ربع ساعة فقط..والمفروض ماتتصليش حاجة ولا رنة ولا اي حاجة..وطبعا مش محتاجة اقول انه مش مفروض تعاتبي اللي فوت الميعاد..لانه لم يهتم اصلا بتبرير موقفه فايه اللي يخليه يستاهل لفت النظر!!!

11-اوزني الشغل والعلاقات الشخصية..وده رايي الشخصي فقط..انه ساعات عشان حد معين بتعزيه ممكن تشيليله حاجة او تكوني لطيفة معاه او تستحمليه في ظرف طاريء ومن ناحية تانية خناقات الشغل مش مفروض تأثر علي العلاقات الشخصية..يعني لو اللي بيحط الجدول عندنا مثلا حطه وحش ده حاجة وعلاقتكم الشخصية حاجة تانية خالص ..يعني اشيلك عشان انت صاحبي..اوك..لكن مش عشان اتخانقنا يبقي خلاص هقطع علاقتي بيك..مش عارفة لقطينها ولا ايه!!

12-ماتحبيش حد..محدش يستاهل!!!!

13-لو اتنيلتي وحبيتي حد امشي ورا اللي انتي حساه حتي لو كان غلط في ناس بتتعلم بالطريقة الصعبة بس هتاخدي علي قفاكي لما تقولي يابس!!!!لكن المرة اللي بعدها هتكون كل حاجة صح ودي الحسنة الوحيدة في الموضوع "وعمري ماشفتها لحد دلوقتي بس املي في ربنا كبير"

14-مازالت مصرة الدخول في اي تجربة شيء رائع جدا..لكن لو عندك فرصة وخبرة كفاية انك تتعلمي من بعيد ليعيد يكون اسلم"طبعا انا مبطبقش القاعدة ديه لأني لازم اتلسع من الشربة والزبادي والايس كريم كمان"

15-كل حاجة بتحصل في وقتها زي ما امة لا اله الا الله بتقول..لكن استباق الوقت والحلام شيء جميل...وغير مؤذي اطلاقا!!

16-هوندا سيفيك ماركة عربيات محترمة هجيبها بعد ما ألم تمنها!!

17-ماتسترخصيش في صبغة الشعر..

18-البس ماركات..

19-اتكلم ببطء..عمرك ماهتضطر تكرركلامك..وعمر ماحد هيعلق علي ان اسلوبك وحش..وعمر ماحد هياقط قصدك ايه بالظبط وممكن تلقح بسهولة تامة!!!ولو كنت دكتور عمر ما اهل العيان هيقولوا عليك مش مهتم وهيدعولك حتي لو كان كلامك البطيء بيقولهم ان مفيش مكان في المحضن او العناية!!

20-مممممم..كفاية كده..عشان عاوزة اتكلم في التلفون ...وللحديث بقية!!