هذا حتي لا اجعل الحياة بمبي بمبي!!!

علي فكرة البوست ده من البوستات اللي بحاول ماكتبهاش لكن حسيت اني كده مش صادقة وان بوري وش واحد بس من الحقيقة.

مش كل الايام في الاستقبال وردية والاستقبال مش في منتهي الروعة.

النهاردة بداية اليوم كانت في منتهي الهدوء حالات قليلة جدا..كولد..

في حالات كانت كويسة حولتها الأحرار لأني كنت عاوزة اذاكر...

حالات تانية كانت عاوزة تتحجز برده حولتها الأحرار عشان مفيش اماكن في المستشفي..

حالة عناية طلعت...حالتين سموم حولتهم وحدة السموم..

ومن هنا بدات المشاكل...بتوع السموم اللي بيقي معظمهم قاعد في البيت اون كول..الحالات كانت مستقرة حولتها هناك..يروحوا التمريض مشربينهم شاركول والدكتورة تبعتهم لي تاني..لحد ماتيجي..

طبعا الناس جايين بيخانقوا دبان وشهم..واحد كان محترم وابن ناس

وناس تانية في منتهي قلة الأدب اللي ربنا خالقها وخمسين واحد داخلين مع الحالة وكالمعتاد مفيش زفت امن!!!

ادي الايام الزبالة القذرة اللي بتعدي علي الواحد في ام المستشفي ديه بسبب غباء ادارتها كلها علي بعضها..محدش حاسس بحاجة من اللي احنا بنعيشها كل يوم.وكل ماتتكلم يتقال معلش هنعمل ايه مفيش حل.

مفيش حل ايه ياجدعان احنا خلعنا مبارك..لكن واضح ان فيه ناس كتير محتاجة تتخلع!!

ناس قاعدة في بيوتها مش حاسة بالبلاوي اللي بتعرض ليها كل يوم كل يوم..من ناس معندهاش ريحة الاخلاق..

داخلين بقي فين الدكتورة بتاعت السموم انتي تبعتينا هناك وهما يبعتونا هنا.. واحد يقول ايه فين ميتين ام الدكتورة ومش هعتذر عن الكلمة لأن ده اللي بيتقال وده للاسف الشريحة اللي بتعامل معاها كل يوم..

روحت ادور علي اي زفت امن يجي..لقيت واحد بقي جاي متشملل يالا يااستاذ اطلع بره..

يروح الحيوان برده يرد عليه انتوا اللي عليكوا تطلعوا بره والله ماطالعين الا ما يتكشف علي البنت اللي هيا بالمناسبة زي القردة!

وواحد من انصاف المتعلمين جاي يقولي واحنا وجودنا تاعب حضرتك في ايه..طبعا ماهو استقبال ابوه مالوش كبير..

الست الهانم دكتورة السموم شرفت,,روحت طالعة فيها انتي ماتبعتيش حالات مستقرة عندي بعد ماانا شفتها.وتقولي ايه انتي بتزعقيلي مينفعش في اخلاق للكلام مع اللي اكبر مني

قلت في سري فعلا بس لما يبقي عنده اخلاقيات تعامل مع الناس اصلا

قلتها ماهو لو الناس جم سمعوكي الكلام الحلو اللي سمعته كنتي عملتي اكتر من كده

ودخلت قلتلهم انت هيتعملكم محضر اهمال..

اهمال ليه ان شاء الله..الواد كان ماشي في الشارع وشرب الازازة..قلتلهم وانتوا ان شاء الله كنتوا فين؟

جه الحيوان وانا مصممة اني اسميه الحيوان يقولي لأ الواد عنده ترجيع بس..قلتله والله؟؟

وجه ابو الواد يقولي لأ مش شارب حاجة ومش هتعملي محضر ..قلتله امال حضرتك جاي تهزر ولا تعمل ايه؟؟

اتفضل خد ابنك وامشي..

قاللي امشي؟؟؟حضرتك دارسة طب؟؟

قلتله مش بتقول ابنك كويس ولا انت جاي تهزر؟؟

هنا دكتورة السموم اتدخلت وغسلته قالتله امال عاوز دكتورة سموم ليه وقالب الدنيا احنا مش بتشتغل ببلاش حضرتك .

هنا بقي لما امه لقيت الاب اتزنق دخلت تقول انا بكلمك يادكتورة بالدين-منتقبة هي- اول بقي ماقالت كده..قلتلها انتي تسكتي خالص وماتدخليش سيرة الدين ابدا كده..ماتقوليش كلام  انتي متعرفيش عنه حاجة...هيتعمل محضر يعني هيتعمل..دخل واحد تلات ارباع متعلم يقولي محدش غلط في حضرتك في حضرتك يادكتورة..قلتله دلوقتي حضرتك؟؟؟ولما تدخلوا فاتحين صوتكم قد كده مش محترمين المكان اللي انتو داخلينه يبقي ايه ده؟؟

طبعا بدا الجر الناعم-طبعا مش محتاجة اقول ان الجيش كان موجود طول الوقت وكان في عسكري فعلا هيضرب الراجل الحيوان اللي عمال يعلي صوته ويقل ادبه-

احنا اسفين ومش اسفين

قلتله برده هيتعمل محضر -اللي ميعرفوش حضرته ان ده روتين ولازم يتعمل عشان مش يلبسونا مصيبة ويقولوا احنا اللي سمينا الولد-

المهم دكتورة السموم روحت الولد لأنه كويس!!!منا قلت كده من الأول محدش صدق اهلي..ماهو لو حالة عناية ان اللي كنت هشتغلها وخلصنا..

وجاية بقي وخداني علي جنب تعرفني غلطي

وانا طبعا علي عكس ماتوقعت قلتلها انا اسفة ياستي ماتقوليش حاجة

طبعا هي انتعشت قوي وانا ريحت دماغي...

ده يوم من الأيام اللي مبحبش اتكلم عنها..

لكن الدنيا كده..ناس تدعيلك وناس تدعي عليك

لكن من رحمة ربنا بينا انه ادري بقلوبنا وعمره مابيستجيب لدعاء باطل ابدا

لكن حسبي الله ونعم الوكيل في كل حد له يد في القرف اللي كلنا بنشوفه كل يوم..