ماذا سأفعل لو كنت مديرا للمستشفي

مبدئيا كده هلغي الزيارة تماما الا من ساعة واحدة فقط يوميا ومحسوبة بالعدد..ويولع اللي مش عاجبه..ماهو اصل لوحد شاف صواني الغدا والعشا والسجاير والعصير والرنجة والفسيخ اللي بتتحطط وحواليها مش اقل من عشر افراد ملمومين حوالين طفل مش قادر اصلا يتنفس هتعمل كده وأكتر من كده..

 ثانيا هفتح باب التسجيل للأطباء الزوار المقيمين وهخليها بفلوس..وهستخدم الفلوس ديه في تخصيص شركة امن خاصة بمستشفي الأطفال...عشان البهدلة اللي طبعا هتحصل لما نمنع الزيارة..

نرجع تاني لمسألة الاطباء الزوار..هيسجلوا عادي الجزء الأول مع الدفعة بتاعتهم..لكن لن يسمح لهم بتسجيل الجزء التاني الا لو بينوا التزام قوي جدا في فترة النيابة الأولي ..وده معناه انه مايسبش نباطشية ويمشي..مايهددش انه يبلغ مرضي لما الجدول يبقي مزنوق..وقصاد هيعامل نفس معاملة النواب الاساسين ويحمل نفس المسؤلية..

ثالثا: هعمل المستحيل عشان اجيب عدد تمريض زيادة..ان شالله ابعت كل يوم ورقة لرئيس المستشفيات,,اصلي زنانة جدا علي فكرة..ماهو لو حد شاف ممرضتين شايلين لوحدهم ستين عيان هيعمل كده وأكتر..

رابعا:هعمل للمستشفي مجلس ادارة..اه ماهو انا مش هشيل القرف لوحدي..وهيكون فيه اجتماع كل شهر معاه ممثلين للنواب والتمريض..

خامسا:هعمل جزء اقتصادي للمستشفي..أمال هجيب فلوس منين...

سادسا:هفتح الصيدلية 24 ساعة مش اخلي الناس تنزل علي ملا وشها الساعة اتنين وتلاتة تجيب دوا..وده معناه اني برضه اجيب صيادلة كتير..الاقتصادي بقي وفلوس الزوار هي ان شاء الله اللي هتغطي ده كله

سابعا:جدول النواب..وكمان مرة جدول النواب..هيتعمل باجتماع اسبوعي معايا شخصيا..لحد مااظبطله قواعد ثابتة تمشي علي الكل..وهتبع شعار ريح النايب..ريح العيان..

ثامنا:هيبقي فيه نظام ثابت للف النواب علي كل وحدة مش بمزاج كل واحد ان شاء الله..وقبل كل روند جديد هيكون فيه امتحان ماقبل ومابعد الراوند..ولو معداش هيتأخر في اللفة عن زمايله الحلوين..ضحكة شريرة جدا!!!

تاسعا:الامتياز...ثم الامتياز...هثبت كل شفت في وحدة ....النظام البدائي الغبي بتاع 5 ايام في كل واحدة ماينفعش ببصلة..مافيش حاجة اسمها امتياز يجيب دم..الا اذا كانوا قدام ده بيتعلموا حاجة مفيدة..علم الامتياز يعني حسسه انه قد المسؤلية يعني ارميه لوحده وراقبه من بعيد..قوة بشرية هائلة ومهدرة..ولما تشوف دكتور كبير مش مستعني يرد علي طبيب امتياز-زميله- هتحس قد ايه بالغباء الطبقي اللي احنا لسه فيه.. ولما تحس قد ايه برده سعادتهم لما بيشتغلوا ويشيلوا المسؤلية هتحس قد ايه احنا هنتحاسب عليهم نفر نفر!!

عاشرا:أم المتين جنيه اللي لازم يتدفعوا عشان تدخل اي حالة عشان قال ايه تضمن ان الأم تعمل جواب التأمين....مضوا الأهل علي فاتورة..سهلة قوي يعني..مضوهم علي وصل..زي ما باقي الدول المحترمة بتعمل كده..الطريف بقي ان اي حد لو له كرسي شغال في المستشفي ممكن يتعمل له اعفا..احيه ولا مؤاخذة!!!

مش فاكرة وصلت لرقم كام: مكتب محترم للسادة النواب...يحتوي علي نت ..جهاز كمبيوتر علي الأقل..بوفيه محترم..مكتبة..انترية كبير..تلفزيون..زي اقل مكان محترم في العالم..

هعد واعد واعد

لكن انا هكون حاجة واحدة بس انا متأكدة منها..اني عمري ماهقول اني فيه حاجة مالهاش حل..ابدا..ابدا..ابدا..