مطاردة عربيات افكاري الماضية!!!

سارت حزينة لحلم انتهي مثل غيره

احلام خيالية بعيدة عن الواقعية

ربما كانت هفوة عقل ..في رأس مريضة نفسيا!

مريضة لا تعرف لا تدري..

امرض هو ام منحة الهية..
او هو -دون ان تدري-لمحة عبقرية.

كل يوم تصحو...في راسها زحمة مواصلات..

افكار تمشي وتركب سيارات..

منها ما تدهسه الاقدام..لأنه لا يعرف قواعد الاشارات!!!

وده كان اول شعر كتبته في حياتي و انا في سنة اولي كليه!!!! ومعظم الناس مش فهموه وواحد افتكر انه طلب انزل الترجمة...تخلف!

لكن شيء جميل ان كل مااقراه  او افتكره احس انه لسه بيعبر عني زي يوم ماكتبته بالظبط!!!

ياتري ده معناه اني كنت صح وتنبأت بشخصيتي اللي هتفضل معايا طول العمر؟؟

 ولا انا حصلي arressted development!!hahahahahahahah!

كمان افتكرت ان كان فيه مشروع رواية بكتبه لأ اتنين واحدة مش فاكرة اسمها والتانية اسمها "مهد"

وطبعا معرفش وديت المسودات فين..لكن كان فيه كيس احمر كبير قوي قوي كنت حاطه فيه كل الحاجات ديه وكل المجلات اللي اتنشرلي فيها حاجات ده طبعا قبل ماعصر البلوجات بيدأ!!!

وفبل ما ستاسات الفيس البوك تلتهم كل افكاري!!

المهم...كان عندي قصة اسمها التماس ميت كانت واخدة المركز الاول علي الجامعة....كانت بتتكلم علي لسان جثث المشرحة..ممكن ابقي اعملها بوست هنا ولو اني مبحبش..بس هفكر!

كمان في سنة تانية عملنا ندوة لدكتور احمد خالد توفيق ومن هنا بدات صداقتي بيه التي اعتز بيها جدا جدا يعني.

كمان د.أحمد خالد نشر لي نفس القصة في رواية من روايات فانتازيا اسمها صديقي جلجامش.بحب الراجل ده قوي أنا.

بعدها بقي حصلي ركود ومستوايا تدهور ومابقتش بكتب علي الاطلاق..حتي الحاجات اللي كنت بكتبها كان مستواها تعبان عالاخر..

افتكر في رحلة من رحلات بيت الشمس في قهوة زينب خاتون لما قعدت  اقرا ليهم قصيدة مشيت في طريق!!!!بعدها كل الناس اللس سمعوها اعادوا التفكير في علاقتهم بيا!!

قريت ليهم كمان النوت اللي كتبتها اسمها عودة الي الحياة..وبجد يمكن انضف حاجة كتبتها بعد التماس ميت..دايما الحاجات اللي بكتبها من غير تركيز بتطلع احسن حاجة..اعتقد اني لازم اضرب حاجة عشان اكتب كويس..او يكون عندي برد او اكون بذاكر..

بعدين لما استلمت النيابة كانت أحداث حياتي اقوي من اني اتكتم..وعملت كام بلوج ..علي فكرة عندي بلوجات سرية كتير!!!!!!!

 واول مرة اطول في بلوج كده...بس خير خير.

المهم بقي هتكلم عن ايه انهاردة..عن اللي بيحصل...

قاعدة في البيت انا وماما فقط..وهي بقي قاعدة عمالة ترغي ترغي..وخلتني انضف الاود وانا بقالي سنة معملتش حاجة..اجبرتها تعملي فطار محترم بدل الرمرمة اللي انا عايشة فيها بقالي سنة..عمالة تتكلم عن الحاجة الوحيدة اللي بتتكلم فيها كل ماتشوف وشي..ومش هقولها عشان انا قرفت..

الطريف بقي انها عاوزاني اعمل الغدا..احيه ولا مؤاخذة..ياست انتي انا ورايا مذاكرة.ترد بكل مابساطة ما انتي قاعدة تتدلعي عالنت..لما الراجل يجيب  الفراخ اغسليهم  واعمليهم ..انا داخلة انام!!!!!!!!!!!!!!!!!!!!!!!!!!

 طب والورق اللي دافعة فيه امبارح خمسين جنيه عشان اذاكر!!!!انا مفحتش حاجة..

انا هكون اول واحدة سقطت في الفرست ..يافضيحتي..

لأ وبكرة هروح المحضن عشان احرج نفسي لأني طبعا مش هفتح حاجة في النيونات..ولازم اروح المستشفي بليل استلم الحالات..ماهو مش موت وخراب ديار هو!!!!

ثانية واحدة بتاع الفراخ جه!!!

انا هقوم اذاكر هما بقي ياكلوا اللي ياكلوه!