وقت المذاكرة

طبعا الكل عارف كمية الافكار العبقرية اللي بتعدي علي دماغك وانت بتذاكر...

فجاة عايز تعمل كل حاجة وحاسس انك قادر علي كل حاجة..

انا بقي اللي ماسك دماغي الأيام اني حاسة بوحدة غير طبيعية..حسه اني اللي بكلمهم مش بكلمهم..اصلا مش مركزة أنا بقول ايه ومش مهتمة..

زي مااكون روبوت مسجل ردود معينة تطلع في وقتها وخلاص..

معروف طبعا اني أصلا ماليش صحاب في الشغل..طبيعي..لكن البيت كمان بعد مع علا اتجوزت في منتهي الهدوء..تقريبا غير الكلام مع امهات العيانين انا مبتكلمش مع حد علي الاطلاق..خالص..

طول اليوم كده

...بنفصل..بنفصل..

طول الوقت بدور علي حاجة تخليني انا ..طول اليوم بستني حد يفهم اللي بتكلم عنه..مش يرد رد سريع دفاعي جاهز يوصل بيه ليا انه رأيه هو احسن وانه عنده حل لكل مشاكل المستشفي لكن للأسف مفيش فايدة..

نفسي اكلم حد من غير مايحسسني انه جرب كل حاجة وانه حاول كل حاجة وانه كان زيي اول لما جه..

 نفسي بدل ما اغلف اللي انا عاوزة اقوله في لفة من الهزار اقول اللي انا حساه لأني متاكدة ان اللي قدامي هيفهمني..

نفسي اتعامل مع حد من غير مايكون فيه تنافس..عشان احنا فريق..

نفسي اكلم حد يكون عنده نفس النظرة للعالم..مش احس اني ببص للدنيا من شباك عمارة في مكان مهجور..

نفسي في صديق..