اضراب الأطباء وكده بقي..

كنت كاتمة في قلبي وساكتة ومش عاوزة افتح الموضوع ده..بس مش قادرة بقي خلاص..

لما الوزير اللطيف يطلع يقول في اطباء في الخارج يعملون تحت قصف الصواريخ..صواريخ يا روح امك؟؟؟؟؟!!!!!!

دول شوية بلطجية حسوا اننا مالناش سعر يا غبي..والله انت كده بتهزا نفسك يا مهزء انت والداخلية كلها لما تساوي البلطجية اللي انتوا مكسلين تحوشوهم عننا بقصف الصواريخ..بوم بوم...!!!!!!!!!!

ايه ده أنا هطق!

بالنسبة بقي للاضراب..انا هقولها بكل صراحة انا مش موافقة علي الاضراب الجزئي ده خالص!!!!!!!

 لازم يبقي اضراب كلي!!! 

اه..يعني العنايات و الطوارئ تتقفل كمان..طبعا كلامي غلط ومش منطقي ومش أخلاقي اصلا أنا عارفة..

لكن لو لفينا لها لفة كده وحسبنا كمية الأطفال والكبار اللي بيموتوا عشان احنا متبهدلين..عشان النظام وسخ وفاسد..هيطلعوا قد ايه..بالهبل طبعا..

العيال اللي بتيجي حالتها معقولة وتدخل المستشفي تسبتك وتتنيل وتموت...دول ايه.. ماهو بسبب اننا مش قادرين نعمل حاجة..

متعلقين من عراقيبنا وخايفين نغضب ربنا باضراب او امتناع عن تأدية خدمة..

قال خدمة قال..تضرب عن  ايه ياعم هو انت اصلا بتفرق مع حد؟؟

الطب في مصر أصلا ماشي بالستر..واللي يقول غير كده يبقي واهم...

الناس بتموت كل يوم..كل ساعة ..كل دقيقة..

خليهم بقي يموتوا بتمن ويبقي بفايدة...والناس كلها تعرف كام واحد بيموت..

 واه الدكاترة يبقوا شريحة اولي طبعا...

مش عشان درسنا 7 سنين ولا حتي عشان اكبر مجموع مع ان ديه اصلا اسباب مهمة..لكن عشان احنا بتعامل مع ارقي وارق حاجة ربنا خلقها علي وجه الأرض..

انت بتتعامل مع روح..كل حاجة بتعملها معتمدة عليك انت..

مينفعش تحس انك محتاج..مينفعش تحس انك ذليل..زمان بيقولوا الطب لابد ان يمارسه الأغنياء فقط..

طبعا لازم نكون اكتر شريحة مستريحة في البلد..انت ماسك في ايدك حياة..مينفعش تماري الطب وانت قلقان علي لقمة عيشك..

والمشكلة ان الكلام ده منطقي وبديهي جدا..لكن الناس اللي متلقحة عالكراسي ديه جايبة الغباء الخام ده منين انا معرفش..

ازاي تكشف علي عيان وانت مخنوق او قرفان او بتشحت لامؤاخذة 

لأ وكمان متوقع في اي لحظة ان حد يرفع عليك مطوة او يسمعك من المنقي خيار!!!!!!!!!!!!

تخلف تخلف تخلف..

لذا انا ادعوا بكل قوة الي اضراب كامل..يعني نقعد في بيوتنا..وتتقفل ام مستشفيات البلد كلها..

واللي يموت اهو موته هيكون بتمن..علي الأقل هيموت معزز مكرم في بيته من غير بهدلة...

وخلي بقي اللي محسسنا اننا مواطنين درجة تالتة او شوية حاجة كده مالناش لازمة او مش عارف يعني ايه كلمة طبيب..

ولكل واحد بقي شايف ان احنا معندناش ضمير واحنا مطالبنا فئوية غير عادلة..ادينا قعدنا في البيت..وريني بقي هتمشي النظام الصحي العظيم بتاعك ازاي..

ولا أقولك سيب البلد وروح اشتغل تحت القصف..يامعفن..