كنت خايفة قوي ارجع المستشفي...لعدة اسباب..منها اني فعلا اكتئبت قوي من البيت..هديت وقعدت وحسيت بالبلاوي والكلاكيع اللي موجودة في حياتي..وكلمة مابقولهاش كتير بس اكتشفت ان انا حزينة..اتحطيت قدام حياتي فاضية تماما...

فكان كل همي اني هضطر اركب قناع السعادة والهزار عشان اعرف اتعامل مع الناس هناك..

وده كان راعبني لأني مش قادرة احمٌل علي نفسي اي حاجة..اي حاجة..

خايفة ارجع امشي في ممرات وأماكن بتفكرني بحاجات وحكايات أنا مش عايزة افتكرها..خاصة بعد الرسالة اللي ربنا بعتهالي النهاردة الصبح وانا راحة الامتحان..واللي حسيت منها قد ايه انا قابلة للكسر..

مكنتش طالبة معايا خالص احس كده...وعشان ماكنتش عاوزة ارجع..

لكن اللي حصل -واللي الكل توقعه من كلامي-هو العكس تماما...

اول مادخلت الكلي..وابلة سماح راحت واخداني في حضناها ورفعاني عالارض شبرين هيلا  بيلا وتقولي بلانيلة اللا ماتخنتي ولا قعدة البيت حوقت معاكي..ايه يادكتورةآلاء..

"قلت في سري اصلها كانت ايام سعيدة جدا انتي ماتعرفيش"

أول ماانوار قالت دكتووورة آلااااااااااااااااااء...وحتي المديرة كانت مبسوطة لما شافتني..

وحتي اول ما حد زميلي شافني وكان متبهدل قوي ياعيني وقالي آلاء ماتروحي تجيبي الحالة من الجامعة مادام العربية معاكي..قلتله حاضر..مكانش مصدق اني وافقت عادي...بس اللي مايعرفوش اني بقالي شهر حاسة اني ماليش اي لازمة في الحياة..وفعلا فعلا محتاجة الاقي لنفسي اي شغلانة  اعملها..

ولا الموقف الرائع اللي حصل النهاردة واللي ماينفعش احكي عليه..بس حسسني قد ايه انك ممكن تلاقي في اغرب الأماكن ناس بتخاف عليكي وعلي مصلحتك..من غير اي مآرب أخري..

لفة الدم ولفة الكلي ولفة الدور الرابع..كنت حاسة بالهوا بيتبدل جوة حويصلاتي الهوائية..

حتي قعدة السكن الحقيرة ليها احساس تاني...

أنا حاسة اني انتمي لهذا المكان عالرغم من اني طول النهار بشتم فيه..

لكن كونك ليك قيمة دي نعمة من ربنا ..مكنتش عارفاها الا لما جربت احاسيس كانت علي وشك انها تدمرني..ده حتي الكشف علي العيال وحشني!!!

د.احمد خالد توفيق قال مرة في سافاري..ان التغيير من روتين حياتك مطلوب...عشان لوحياتك بائسة اديك خدت منها فسحة قليلا..

ولو حلوة هتشتاق ليها قوي وتعرف قيمتها..

وأنا شاكرة لأني حياتي الروتينية اللي أنا كنت فاكراها بائسة وحشتني قوي قوي..

شاكرة لأني حاسة اني مستخلفة في الأرض وعلي ثغرة حيوية من ثغرات الخلافة..واي مشاكل في حياتي بتخف مش هقول بتتدفن..لأ بتخف كل يوم من احساسي اني بساعد حد..

من ان عامل شغال في المستشفي يجي ورايا مخصوص عشان يسلم عليا سلام ولا كأني عملته ايه مع اني عمري ماخدمته أصلا..

حاجة كمان..أنا بشوف ربنا كل يوم في المستشفي..

----------------------------------------------------------------

ملحوظة...أنا عملت دي اكتيفاشن للاكونت عالفيس بوك لأجل غير مسمي..يمكن يوم يمكن شهر لسه معرفش..ولدي اسباب مطولة..

ياريت لو حد حابب يبقي يسيب الكومنتات هنا...مش عاوزة احس اني بكلم نفسي "مع اني عاملة البلوج ده أصلا عشان كده اصلي ساعات بقول حاجات حلوة..هع هع هع هع"